2007 – Händr ämänd kei Römer-Fundament?

„ä Tonne Wasser mit gnueg Zement
und scho stoht das Fundament.
3 Mol dr Winkel und s’Dach on top
do söll no ein säge das sigi ä Flop.
d’Statik - jo - das isch sone Sach
er isch ebe grad in de Ferie dr Maa vom Fach.
d’Eröffnig aber isch ä Gaudi gsi
s’isch erscht grad öpe ä Wuche verbi.
do chlöpfts und duets - es isch ä Gruus -
es haut eus d’Schiibe us em Huus!“
das het eus letschti ein verzellt
ein vo Prattele, dä het eus glaub gschellt!
dr Boode heig sich liicht verschobe
mir glaube schlicht s’Fundament het nid ghobe.
und das chöne mir ebe nid verstoh
wiso händr nid eis vo eusne gno?
ihr heit jo z’Prattele uf dr Allmend
weissgot gnueg eso Fundament!
dr LIDL het das besser gmacht
dä stoht jetzt nämlig bi eus in dr Pacht.
und au dr Kari git sich nur
zfride mitere Römermuur
z’Basel froge si: „Hän mir ämend
denn kei eso Römer-Fundament?“
mir hei zwar gseit, dass do nüt isch
aber so schnell isch das dört nid vom Tisch.
bis 5000 Meter hei si boort
Menschenskind het das g’rumoort!
Angscht hämmer gha wo das afangt bebe:
„hoffentlich duet dä Triago hebe!“
und dr Beat voller Bange
het alli Plakat wo z’Prattele hange
präventiv grad ihne gno,
doch das chönne denn nid alli verstoh.
bis ufe nach Flims - het mir ein gseit -
heige sich die Schwingige treit.
aber das Bebe - nimmt me jetzt ah -
het doch ä andere Uslöser gha!
jetzt nomol zrugg zum Prattler Bode:
mir Römer si dört voll in Mode.
inspiriert vo eusem Bau
lanciere si ä Supergau.
Salina Raurica unde am Rhy
und Raurica Nova – lönts doch lo si!
ä guete Rot wei mir euch offeriere:
d’Bodehaftig darfsch nie verliere!
und dorum halte mir dra fescht
eusi Muure si immer no s’Bescht!

zrugg zu dä Sujets