2010 – Isch das ä Gadd-Affetheater!

Mir Niggelis sin chli verwirrt
vo däm Theater irritiert
In de Nochrichte miesse mir verneh
dass es d’Schwiz nüm länger sölli geh
Ufteile wän si euses Land
Mir sin empört, es isch ä Schand
und euse Bundesrot Herr Merz
glaubt ganz fescht es sig ä Scherz
Eus loht die Nochricht gar kei Rueh
Mir mache eus grossi Gedanke drzue
Zum Schwobeland söll Prattele ghöre
und uf d’Angela Merkel schwöre
Euse Fluss, dr schöni Rhy
söll nümme länger d’Grenze si?
Und fahrsch denn mol ins Wallis abe
findsch dört nüm dr Röschtigrabe
Stattdesse passiersch die französisch Grenze
und nach em Gotthard duet dr Berlusconi glänze
Mir froge eus, chunnt das ächt guet
wenn me Basler mit Schwobe mische duet
Bim Schutte mache si’s eus vor
Dr FCB Trainer schreit neu „Tor“!
Und luegsch mol eusi Nati a
findsch plötzlich doch no Gfalle dra
Au in Prattele gspürsch dä Trend
wenn jede gli in Lidl rennt
So dien au mir eus vorbereite
und lön eus vom Dütsche Bruchtum leite
Mir ziehn als Funke-Niggelis dur d’Strosse
Hei dasch aber früsch so ohni Hose!
Mir iebe Hellau, Narinaro
Dumm schnure chönne mir sowiso
Und im ’ne Joor - mir glaube dra -
het jede Schwob zwei Zoggeli a

zrugg zu dä Sujets