2011 – Ich glaub mi knutscht en Elch!

10 Joor Ikea – hän mir eus gfreut!
Kei Ichauf hän mir je bereut

10 Joor shoppe vo frieh bis spoht
ohni dass eus d’Luscht vergoht

Vom alte Züg söllsch di befreie
und zum Fenschter use gheie

So wills dr Knut, dä chunnt us Schwede
doch das weiss äfang ä jede

D’Family Card die isch dr Hit
wills immer tolli Schnäppli git

Und nach dr Kasse unde in
ligt immer none Hot-Dog drin

Stiehl und Lampe packsch in Chare
und duesch wider heime fahre

Doch was miesse mir verneh
Es söll neu Parkgebühre geh!

Für die Lucke wo mir Fraue
uf Ahiib eusem Gschick vertraue

mien die Läde neu kassiere
um dr Fahrstrom z‘reguliere

Fufzig Rappe oder meh
sölle mir fürs Parke geh

Hets ächt em Schnüffler afo stinke
will si d’Autos dure winke?

Prattele will drum suuber blybe
So stohts am Bahnhof unde gschriibe

Mir Fraue mien jetzt reagiere
Und eus neu organisiere

Jedi Fahrt – mir miens betone -
muess sich ab jetzt dopplet lohne

Bunti Stoff und Dekocherze
ligge eus halt sehr am Herze

Mir chaufe i, dien investiere
und eusi Wohnig dekoriere

So blibe mir däm Bann verfalle
Gibs zue, dir duet doch das au gfalle

zrugg zu dä Sujets