2014 – Simone (Schore)Niggli Luder

Ganz Prattele isch voll nervös
und zeigt sich drum sehr generös
Kei Mieh und Chöschte het me gscheut
damit me joo au nüt bereut
D’Frau Simone Niggli söll drum do
uf Prattele an OL cho
Hejo das isch doch sunneklar
muesch öpis biete für dä Star

Das Pratt‘le isch bitz eifach ghalte
Me het’s drum miesse chli umgstalte
Dr Abschnitt Schaueburgerstross
dä sig no chli Idee-los
So zwei, drei Pföschtli grob verteilt
wo dr Läufer denn apeilt
söll dr Strecki Pfiff verleihe
Me hofft s’dieg niemmer drüber gheie

Dr Charteschriber heig au z‘tue
und machi z‘Nacht kei Aug me zue
Er heig drum welle ihne mole
wo me sich cha z’Esse hole
Dr Bahnhofposchte – sone Quark
isch jetzt neu erscht bim zum Park
„Nei jetzt gib ich’s aber uf,
d’Beizer schrib ich gar nüm druf“

Damit au d’Bsuecher chönne cho
und s’Auto bim Hotel lo stoh
sorgt ä Bus neu für d‘Verschiebig
und macht scho flissig Troche-Iebig
Wenn’d eus mit em Töff wottsch bsueche
söttsch denn eifach zerscht versuche
d’Charte ganz genau z‘studiere
Sunscht chönnt dir ä Mallör passiere

Okay, mir hän chli fantasiert
Vill isch aber echt passiert
Und vellicht, mir werde’s gseh
wird’s dä OL jo mol geh
Dr Hertner hätti sicher Freud
wenn Prattele kei Ufwand scheut
Ä bitzli Sport – das cha me säge
würd no jede do verträge

Eini aber wird nid starte
beschäftigt sich nüm mit de Charte
Suecht nüm hinter jedem Pfoschte
dr negschti wichtig OL-Poschte
Was sie jedoch scho gleischtet het
isch uf Neu-Dütsch „Mega fett“
D’Frau Simone Niggli – findsch nid au?
isch ä echti Power-Frau

Das gfallt eus halt, das muesch verstoh
drum sin mir als Frau Niggli cho
Mir wän jetzt au nüm länger warte
und dr Fasnachts-OL starte
Ä Sports Award hän mir zwar nid
mir fiire aber trotzdäm mit
Und dien au das Joor fescht probiere

d’Orientierig nid z‘verliere

zrugg zu dä Sujets